اسرار صوفیاء

ارشاد

صوفیاء کیا صطلاح’’مبہمات ‘‘ کی وضاحت

صوفیا ء کی اصطلاح ’’موھمات ‘‘کی وضاحت

صوفیا ء کی اصطلاح ’’ہفوات ‘‘کی وضاحت

صوفیاء کی اصطلاح ’’شطحات ‘‘کی وضاحت

اصطلاح ’’غلبہ حال‘‘ کی معرفت

اصطلاح ’’ صحو وسکر ‘‘ کی معرفت

اصطلاح ’’عام خاص اور مطلق و مقید‘‘ کی معرفت

رسوم تصوف کے حقائق کی معرفت

صوفیہ کے علوم وحقائق کی معرفت

دلائل صوفیہ کے درجات

اصطلاح’’ وحی الہٰی‘‘اور صوفیائے کرام

کشف کا کمال

ادراک

مقام حیرت

تمکین اور تلوین

تجرید وتفرید

مبتدی ومنتہی

فیض

حضور وغیوب

اتصال واتحاد

عالم امر اور عالم خلق کیا ہے؟

تجلی کیاہے؟

سیر الی اللہ

سیر فی اللہ

اسرار صوفیاء

صوفیاء کرام کے درمیان بہت سارے ایسے الفاظ بولے جاتے ہیں ،جن کا تعلق اسرار ورموز سے ہوتاہے،انسانوں نے شروع سے ہی اشاروں ،کنایوں میں بات کرنا سیکھا ہے،کیونکہ اللہ تعالیٰ  کے کلام میں بھی  اشارات وکنایات موجود ہیں ،ان رمو ز میں کلام کی اصل روح کو بیان کیاجاتاہے،صوفیاءفرماتے ہیں یہ سر بھی روح کی طرح ایک لطف چیز ہے،جو جسم کے ڈھانچے میں ہی رکھی گئی ہے،صوفیاء کرام کے اصولوں سے معلوم ہوتاہے کہ سر مشاہدہ کا محل ہے،جس طرح روح محبت کا محل اور دل معرفت کا محل ہے۔

صوفیائے کرام فرماتے ہیں سر اس راز کو کہتے ہیں جو بندے اور حق تعالیٰ کے درمیان محفوظ اور پوشیدہ رہتاہے،سر اس راز کو بھی کہتے ہیں جس پر تفکر وتدبر کے بغیر پہنچنا ممکن نہ ہو،عربوں میں ایک محاورہ بولا جاتاہے:’’صَدُورُ الْاَحْرَارِ قُبُوْرُ الْاَسْرَارِ‘‘ آزاد لوگوں کے سینے اسرار کی قبریں ہیں ۔   یہ بھی کہا گیا ہے کہ سر وہ ہے جسے حق تعالیٰ نے غائب رکھا ہو  اور اس پر صرف حق تعالیٰ ہی مطلع ہوتا ہے۔ اس کے علاوہ سرالسر ہوتا ہے جس کا احساس سر بھی نہیں کر سکتا ہے۔ہرفن کے کچھ دقائق و حقائق ہوتے ہیں جن سے اس فن کے ماہرین آشنا ہوتے ہیں ، ان کی صحبت میں رہے بغیر دوسروں کو ان کی معرفت نہیں ہو پاتی اور صحبت کے بغیر اگر ان کو حاصل کرنے کی کوششیں کی جاتی ہیں تو اکثر غلط فہمی اور مقصود سے دوری کے سوا کچھ ہاتھ نہیں آتا ،تصوف کے دقائق وحقائق کی معرفت کے سلسلے میں تو صحبت اور بھی ضروری ہوتی ہے، کیوں کہ دوسرے فنون کے دقائق وحقائق عقل کا فیضان ہوتے ہیں ، جب کہ صوفیہ کے دقائق وحقائق روحانی فیوض اور ر بانی الہامات ہوتے ہیں جو مصفیٰ ومز کیٰ قلوب پر انعام الٰہی کے طور پر اتر تے ہیں۔

ارشاد

عام طور سے صوفیہ کرام و بزرگان دین کی تمام باتوں کو نقل کرتے وقت لکھا جا تا ہے : ”فلاں بزرگ ارشادفرماتے ہیں‘‘یہ تعبیر اگر چہ عام ہے اور ہدایت فرمانے، حکم دینے اور کہنے کے معانی کو شامل ہے، لیکن صوفیہ کے خاص محاورے اور اصطلاح میں قابل غور ہے کیوں کہ صوفیہ کے یہاں’’ارشاد ‘‘کا معنی’’ قول محکم‘‘ ہے، ان کے تمام اقوال ’’ارشاد‘‘ نہیں ہوا کرتے کیوں کہ ان کے اقوال پر بھی کلام الٰہی اور حدیث رسول کا رنگ ہوتا ہے ،قرآن کریم اور احادیث رسول میں تمام اقوال کا تعلق محکمات سے نہیں،بلکہ ان میں کچھ متشابہات بھی ہیں ،خودقرآن کریم میں اللہ تعالی کا ارشاد ہے:     

ھُوَالَّذِيْٓ اَنْزَلَ عَلَيْكَ الْكِتٰبَ مِنْہُ اٰيٰتٌ مُّحْكَمٰتٌ ھُنَّ اُمُّ الْكِتٰبِ وَاُخَرُ مُتَشٰبِہٰتٌ۔[سورآل عمران:۷]

 اسی ذات کریم نے آپ پر کتاب اتاری، اس میں کچھ آیتیں محکم ہیں اور کچھ متشابہ ہے۔

 پھر متشابہ آیتیں بھی دوطرح کی ہوتی ہیں ایک تو وہ جن کا معنی سرے سے معلوم نہیں مثلا الم ۔ حم عسق وغیرہ جن کو آیات مقطعات بھی کہا جا تا ہے ، دوسرے وہ جن کا’’ ظاہری ،لغوی ،حسی‘‘ معنی تو معلوم ہوتا ہے لیکن وہ مراد لینا درست نہیں ہوتا ،مثلا وجہ اللہ، یداللہ وغیرہ۔ اسی طرح احادیث کریمہ میں بھی بعض کا تعلق متشابہات سے ہے اور اس کے حقیقی معانی ہمیں معلوم نہیں مثلاً’’اَلحَجْرُ الأَسْوَدُ يَمِيْنُ اللهِ( حجر اسوداللہ کا داہنا ہاتھ ہے)۔ اور بعض کا تعلق’’ مبھمات اور موھمات‘‘سے ہے جیسے اللہ کے رسولﷺنے فرمایا: إِنَّ الْجَنَّةَ لَاتَدْخُلُهَا عَجُوْزُ ( کوئی بوڑھی جنت میں نہیں جائے گی) ۔ یوں ہی صوفیہ کے اقوال وافعال بھی ’’محکمات اور متشابہات ‘‘پر مشتمل ہوتے ہیں، ’’محکمات‘‘  کو صوفیہ کی اصطلاح میں ’’ارشادات‘‘ کا نام دیا جا تا ہے جبکہ متشابہات کی کئی قسمیں ہوتی ہیں اور سب کے جدا گا نہ نام ہیں ۔

۔

مبہمات

جس طرح قرآ ن وحدیث میں بعض الفاظ مبہم ہوتے ہیں ،اسی طرح صوفیا کے بھی بعض اقوال مبہم ہوتے ہیں ،صاحبو!مبہم کی جمع مبہمات آتی ہے ،اور  مبہمات  ان اقوال کو کہا جا تا ہے جس میں متعد د احتمالات ہوں ، جن کی وجہ سے ان میں ابہام پیدا ہو گیا ہو لیکن اس کے باوجود وہاں صحیح احتمال کو سمجھنا اور مراد لینا آسان ہو۔ جیسے اللہ کے رسول ﷺ کا فرمان :إِنَّ الْجَنَّةَ لَاتَدْخُلُهَا عَجُوْزُ( کوئی بوڑھی جنت میں نہیں جائے گی ) اس میں ایک معنی جو ظاہر ہے وہ یہ کہ کوئی بوڑھی جنت میں نہیں جائے گی ،لیکن دوسرا معنی کہ کوئی بوڑھی ہونے کی حالت میں جنت میں نہیں جائے گی ، اس کو آسانی سے سمجھا اور مرادلیا جاسکتا ہے ۔اس ذیل میں بعض صوفیہ کے اس قول کو بھی رکھا جاسکتا ہے جس میں انہوں نے فرمایا کہ سلوک طے کرتے ہوئے سالک ایسے مقام پر پہنچ جاتا ہے جہاں تکلیف شرعی ساقط ہو جاتی ہے یہ جملہ ’’مبہمات مشائخ‘‘ کے قبیل سے ہے ، اس کا ایک معنی جو ظاہر ہے یہ ہے کہ سالک کے لیے ایسا کوئی مقام بھی ہے جہاں شرعی احکام کی پابندی ختم ہو جاتی ہے، لیکن یہ مردود ہے، اس کا ایک دوسرا معنی بھی ہے جو پہلے معنی کی طرح ظاہر تو نہیں لیکن آسانی سے مراد لیا جاسکتا ہے اور بلا تکلف سمجھا جاسکتا ہے وہ یہ ہے کہ ’’سالک دوران سلوک ایسے مقام پر پہنچ جاتا ہے جہاں احکام شرعیہ کی ادائیگی میں پائی جانے والی کلفت و مشقت ختم ہو جاتی ہے اور اس مقام پر پہنچنے کے بعد سالک احکام شرعیہ کی بجا آوری میں ایمانی حلاوت اور عرفانی لذت پانے لگتا ہے‘‘۔

موھمات

وفیاء کے نزدیک موھمات  : ان اقوال کو کہا جا تا ہے جن میں متعد د احتمالات ہوں اور ان کے صحیح معنی اور صحیح احتمال تک آسانی سے ذہن نہ پہنچتا ہو بلکہ تفکر وتدبر کے بعد ہی اس کے صحیح معنی تک رسائی ہو سکتی ہو۔ جیسے کسی صوفی کا یہ قول کہ اس راہ میں ابلیس بھی دوست ہو جا تا ہے۔ ظاہر ہے کہ یہ قول بظاہر وحشت ناک ہے اور اس کی کوئی صحیح تاویل سمجھ میں نہیں آتی ،لیکن غور وفکر کے بعد اس کا ایک صحیح پہلو اس وقت سامنے آتا ہے جب ہم حضرت ابو ہریرہ رضی اللہ عنہ کی اس حدیث کو پڑھتے ہیں جس میں وہ خود بیان کرتے ہیں کہ اللہ کے رسول ﷺ نے ان کو صدقے کے مال کی حفاظت پر متعین کیا تھا، چنانچہ ایک رات ایک شخص نظر آیا جو جلدی جلدی غلہ سمیٹ رہا تھا، حضرت ابو ہریرہ رضی اللہ عنہ نے اس کو پکڑ لیا ، اس پر وہ شخص گر یہ وزاری کرنے لگا، اس کی یہ حالت دیکھ کر حضرت ابوہریرہ نے اس کو چھوڑ دیا، اگلے روز حضورﷺ کے دریافت کر نے پرانہوں نے سارا ماجرا کہہ سنا یا، حضور ﷺنے فرمایا وہ جھوٹا ہے وہ کل پھر آئے گا، چنانچہ وہ دوسری اور پھر تیسری شب بھی آیا اور ہر بار اس نے بہانے بنائے ، تیسری بار اس نے حضرت ابو ہریرہ سے کہا کہ اے ابو ہریرہ! مجھے چھوڑ دو میں تم کوایسی بات بتا تا ہوں جس سے تم کو فائدہ ہوگا اور پھر اس نے بتایا کہ اے ابوہریرہ سونے سے پہلے آیت الکرسی پڑھ لیا کرو ، حضرت ابو ہر پر صبح کو آئے اور اللہ کے رسول ﷺ سے سارا واقعہ سنا یا حضور ﷺنے فرمایا کہ وہ ابلیس تھا، اس نے سچ کہا، اگر چہ وہ بہت بڑا جھوٹا ہے۔

اس روایت سے معلوم ہوتا ہے کہ کبھی شیطان اپنے مقصد کی تحصیل کے لیے خیر کی جانب بھی رہنمائی کرتا ہے ۔اس واقعے سے معلوم ہوتا ہے کہ شیطان نے خیر کے راستے میں حضرت ابوہریرہ کی مدد کی ، اب اس تناظر میں اگر یہ کہا جائے کہ اس راہ میں ابلیس بھی دوست ہو جا تا ہے تو یہ قول غلط معلوم نہیں ہوتا ۔ ویسے اس قول کی دیگر درست تاویلات بھی موجود ہیں۔