اللہ تبارک و تعالیٰ نے مخلوق انسانی کو پیدا فرمانے کے بعد اس کی رہنمائی کے لیے انبیائے کرام علیہم السلام کو مبعوث فرمایا اور سلسلۂ انبیا کی پروقار لڑی کے آخر میں محبوب کونین ﷺکو پرو کر سلسلہ نبوت کو مکمل فرمادیا۔ اب تا قیامت کسی نئے نبی یا رسول کی بعثت نا ممکن ہے ۔امت محمدیہ ﷺکوجہاں اللہ تعالیٰ نے یہ شرف بخشا کہ یہ آخری نبی خاتم النبیین ﷺکی آخری امت ہے، وہاں یہ فضلیت بھی عطا کی کہ یہ امت سابقہ تمام امتوں میں سے سب سے بہتر ہے اور اس بہترین امت ہونے کی وجہ امتیاز یہ ہے کہ اس امت کے ہر فرد کو یہ فریضہ سونپ دیا گیا کہ اب قیامت تک آنے والے تمام انسانوں کی رہنمائی اسی امت نے قرآن مجید فرقان حمید اور اسوۂ خاتم النبین ﷺکی روشنی میں خود کرنی ہے ۔ اس فریضہ کو نبھانے کے لیے اللہ تعالیٰ نے امت محمدیہ ﷺکی تاریخ میں ہمیشہ کچھ لوگوں کا بطور خاص انتخاب بھی فرمایا جنھوں نے انسانیت کو اندھیروں سے نکال کر روشنی کا مسافر بنادیا۔ ان منتخب افراد میں سے ایک نام حضرت شاہ کلیم اللہ جہاں آبادی رحمۃ اللہ علیہ کا ہے ۔آپ کاشمارسلسلہ چشتیہ کے مشہور ومعروف اولیائے دہلی میں ہوتا ہے اور قرطاسِ تاریخ میں یہ بات روز روشن کی طرح عیاں ہے کہ برصغیر میں تبلیغ اسلام کے حوالے سے سلسلہ چشتیہ نے نمایاں خدمات سر انجام دیں، آپ کی شخصیت بھی اسی سلسلہ کی ایک مضبوط کڑی ہے ۔آپ کو شیخ المشائخ،عالم وعارف،محدثِ کامل اور مجدد ِ سلسلۂ چشتیہ نظامیہ جیسے القاب کے ساتھ یادکیاجاتاہے ۔آپ کے آباؤاجداد شاہجہانی دور میں ’خُجَند‘ ترکمانستان موجودہ ( تاجکستان) سے ہجرت کر کے دہلی آئے اوریہیں مستقل سکونت اختیار کرلی۔ آپ کی ولادت باسعادت 1060ھ بمطابق 1650ء کو دہلی میں ہوئی۔آپ کے والدگرامی کانام حاجی نور اللہ صدیقی جب کہ داد اکانام ’شیخ احمد صدیقی‘(رحمۃ اللہ علیہما)تھا۔آپ کا سلسلۂ نسب خلیفۂ اول سیدنا صدیقِ اکبررضی اللہ عنہ تک پہنچتا ہے ۔ آپ کاگھرانہ علمی و روحانی اعتبارسے اپناایک امتیازی تعارف رکھتاتھابالخصوص فنِ تعمیرمیں ایک الگ پہچان کاحامل گھرانہ تھا۔اس لئے آپ کی تعلیم وتربیت کا اہتمام بھی خاندانی روایت کے مطابق کیاگیا۔ان دنوں دہلی علوم وفنون کا مرکزتھا۔چنا نچہ آپ نے بھی دہلی کے جلیل القدر علما،صلحا اوراساتذہ سے ظاہری و باطنی علوم میں اکتساب ِفیض کیااور تمام علوم و فنون میں مہارت ِ تامہ حاصل کرکے دہلی کے متبحر علما میں شمارہونے لگے ۔آپ کے اساتذہ میں سید محمد غوث گوالیاری رحمۃ اللہ علیہ کی اولاد میں سے شیخ برہان الدین المعروف شیخ بہلول رحمۃ اللہ علیہ اور حضرت شاہ عبد الرحیم محدث دہلوی رحمۃ اللہ علیہ کے بڑے بھائی شیخ ابو الرضا الہندی رحمۃ اللہ علیہ کا نام خاص طور پر قابل ذکر ہے ۔ حصولِ علم کے بعد اس دورکے جلیل القدراوراعلیٰ مقام ومرتبے کے روحانی بزرگ سیدحسن رسول نما رحمۃ اللہ علیہ کی خدمت میں حاضر ہوکر بیعت کے لئے عرض کیاتوانھوں نے فرمایاکہ تمہارا حصہ یہاں نہیں،تم حضرت شیخ یحییٰ مدنی رحمۃ اللہ علیہ کی بارگاہ میں مدینہ منورہ حاضرہوکر اُس گلشنِ معرفت سے خوشہ چینی کرو۔ لہٰذاآپ نے مدینہ منورہ میں شیخ یحییٰ مدنی رحمۃ اللہ علیہ کی خدمت میں حاضر ہوکر بیعت کی،مجاہدات و سلوک کی منازل طے کیں اور سلسلہ چشتیہ میں خلافت حاصل کی۔آپ کی شخصیت علم و فضل اورروحانیت میں یگانہ روزگار تھی۔آپ نے انسانیت کی رہنمائی کے لیے دہلی میں درس حدیث اور تصنیف کا سلسلہ شروع کیا۔آپ کے تذکروں میں آپ کی تیس کتابوں کے نام بھی ملتے ہیں جو آپ نے لکھیں۔آپ نے ایسے دور میں علم کی شمع روشن کی جب مسلمانان ہندعلمی ،روحانی،سیاسی اور معاشرتی اعتبار سے نہایت نازک دور سے گزر رہے تھے ۔اس دور میں آپ کی شخصیت علم و معرفت ،رموزو حکمت اور احسان و سلوک کا سر چشمہ تھی ۔آپ کے آباؤ اجداد کا پیشہ معماری تھا اور اللہ تعالیٰ نے آپ کو دلوں کی معماری کے لیے منتخب فرمایا۔ ہزاروں تشنگان معرفت اپنی پیاس بجھانے دہلی کے مشہور بازار ’خانم ‘ میں موجود آپ کے مدرسہ میں آتے اور شائقین علم و فضل آپ کے حلقہ درس میں شامل ہونا باعث فخر و مباہات تصور کرتے ۔آپ مہمان نواز، سخی، خوش اخلاق اور توکل علی اللہ کی عملی تصویر تھے ۔درس حدیث میں شامل ہونے والے لوگوں کے کھانے کا اہتمام خود فرماتے ، کسی کی طرف سے تکلیف پہنچتی تو کبھی ناراضگی کا اظہار نہ فرماتے اور اپنے مریدین کو بھی حکم فرماتے کہ لوگوں کی جفا کو برداشت کریں، شکایت کے لیے لب نہ ہلائیں۔ آپ اکثر فرمایا کرتے کہ ہمارا کام دلوں کو ایک جگہ جمع کرنا ہے ، اس میں جتنی بھی مشکلات آئیں ان کو خندہ پیشانی سے برداشت کرنا چاہیے ۔آپ کی ہمیشہ یہ خواہش ہوتی کہ آپ کے تمام مریدین تبلیغ اسلام اور احیائے دین کے لیے کوشش کریں ۔ آپ فرماتے ہیں کہ جب تک اعلاء کلمۃ اللہ کے لیے کمر ہمت نہ باندھ لی جائے خلافت کا کوئی فائدہ نہیں،احیائے دین کی کوشش کرو یہی ہمارا مسلک ہے اور یہی ہمارے بزرگوں کا مسلک ہے ، اس میں کوتاہی اچھی نہیں۔آپ اپنے شاگردوں اور مریدین کو مختلف علاقوں میں تبلیغ دین کے لیے مامور فرماتے اور ان پر سخت نگرانی بھی رکھتے ۔آپ روحانی ترقی کے لیے اتباع شریعت کو نہایت ضروری قرار دیتے تھے ۔آپ کا عقیدہ تھا کہ جو شریعت کی راہ پر نہیں چلتا وہ گمراہ ہے اور شریعت کے بغیر طریقت و حقیقت کی منازل کبھی طے نہیں کی جا سکتیں۔

آپ کو مجدد سلسلہ عالیہ چشتیہ کہاجائے تو مبالغہ نہ ہوگا۔کیونکہ جس وقت آپ دہلی میں مسند آرا ہوئے اس وقت سلسلہ عالیہ چشتیہ کا خانقاہی نظام زوال پذیر تھا۔خانقاہیں ویرانی کا منظر پیش کررہی تھیں۔آپ ہی کی ذاتِ مبارکہ ہے جن کی وجہ سے سلسلہ عالیہ کو پھر سےعروج نصیب ہوا۔دورِ انحطاط کو دورِ عروج میں بدلنے کا سہرا آپ کے سر ہے۔شیخ الاسلام حضرت خواجہ نصیر الدین چراغ دہلوی کےبعدایک خلا پیدا ہوگیا تھا۔اس خلا کو آپ نے ہی پر کیا۔حضرت شاہ کلیم اللہ نے خانقاہی نظام کی ایسی بنیاد رکھی جس نےبالخصوص  اسلامیانِ ہند کوپھر سے ایمان وایقان کی قوت اور علم و حکمت  اور معرفت کےخزینے عطاکیے۔وہ خانقاہیں پھر  ایسی نہ  رہیں  جن میں صرف ہر وقت لنگر چلتا رہے،اور درویش صرف نعرے لگاتے رہیں۔ملت اسلامیہ اور تعلیم اسلام سے کوئی سروکار نہ ہو۔بلکہ حضرت شاہ کلیم اللہ نے ایسی خانقاہ کی بنیاد رکھی کہ جس میں ہر مرید وخلیفہ پر لازم تھا کہ وہ پہلے علومِ ظاہری میں مہارت ِ تامہ حاصل کرے،تاکہ دین ِ اسلام کے تمام شعبہ جات کی بنیادی معلومات حاصل ہوں،اور وسیع بنیادوں پر دین کی خدمت کرسکے۔پھر عوام میں جاہل صوفیاءنے  جو غلط فہمی پھیلادی تھی کہ اصل صوفی وہ ہوتا ہے کہ جس کا علم و شریعت سے دور کاواسطہ بھی نہ ہو۔حضرت شاہ صاحب نے تمام علوم ِ نقلیہ و عقلیہ کا درس دےکر اس غلط فہمی کا ازالہ کردیا۔

آپ کی  ذات والاصفات سے سلسلہ عالیہ چشتیہ کو ایک اورمنہج ملا۔آپ کے خلیفہ حضرت شاہ نظام الدین اورنگ آبادی جید عالم دین کے ساتھ شیخِ طریقت بھی تھے۔اسی طرح ان کے صاحبزادے و جانشین حضرت فخرالدین فخرِ جہاں اپنے زمانے کےتمام علماء میں ممتاز مقام کے حامل تھے۔پھر ان کےخلیفہ حضرت قبلۂ عالم خواجہ نور محمدمہاروی،اور شاہ نیاز بریلوی وغیرہ رحمہم اللہ،اور پھرآپ کےخلفاء، حضرت خواجہ نور محمد نارو والا،حضرت قاضی عاقل محمد کوٹ مٹھن شریف،حضرت خواجہ شاہ محمد سلیمان تونسوی،حضرت خواجہ حافظ محمد جمال اللہ ملتانی،پھر ان سے حضرت خواجہ خدابخش خیر پوری،حضرت خواجہ عبیداللہ ملتانی،مولانا عبدالعزیز پرہاروی ،حضرت خواجہ  شمس العارفین،حضرت شیخ الاسلام پیر مہر علی شاہ،حضرت خواجہ فیض محمد شاہ جمالی یہ سب حضرات اور پھر ان کے خلفاء در خلفاء سب آفتابِ شریعت اور ماہتابِ طریقت تھے۔اپنے وقت میں یہ ہستیاں علم و معرفت میں اپنا ثانی نہ رکھتی تھیں۔اس نظام کی بنیاد رکھنے والے حضرت شاہ کلیم اللہ شاہ جہاں آبادی ہیں۔

‎  آپ کی خدمت میں مخلوقِ خدا جوق در جوق حاضر ہونے لگی۔حتیٰ کہ امراء و وزراء اور اورنگ زیب عالمگیر حاضر ہوئے،اور پھر باربار حاضر ہوتے رہے۔آپ سے فیض حاصل کرتے رہے۔اورنگ زیب عالمگیر کے بعد ان کے فرزندبھی عاجزانہ حاضر ہوتے رہے،اور محمد شاہ بادشاہ تک جتنے سلاطین بھی تختِ دہلی پر متمکن ہوئے سب ہی اس آستانہ کے غلام تھے۔

دہلی میں حضرت شاہ صاحب کی مالی حالت اچھی نہ تھی۔لیکن اللہ تعالیٰ نے آپ کو توکل اور قناعت کی بے پناہ دولت دے رکھی تھی۔ کبھی کبھار تو فاقے بھی ہوجاتےتھے،لیکن اس مردِ قلندر نے کبھی کسی حاکم سے نذرانہ نہیں لیا۔۔ کئی  مرتبہ شاہِ دہلی فخر سیر نے بڑی عاجزی سے اصرار کیا کہ حضرت اپنی ضروریات کےلئے سرکاری خازنے سےرقم لےلیاکریں۔لیکن آپ نے ہر بار پیشکش مسترد کردی اور فرمایا: ’’اللہ تعالیٰ نے اتنا دیا ہےکہ مجھے زیادہ کی حاجت ہی نہیں ہے‘‘۔اسی نے ایک بڑی حویلی دینے کی پیشکش کی،آپ نہ مانے۔اس نے حاضری کی اجازت چاہی مگر آپ نے ٹال دیا اور فرمایا: تمھارے آنے سے ہمارے معاملات متأثر ہوں گے۔لہذا بذاتِ خود آنے کی بھی ضرورت نہیں ہے۔بادشاہ نے اس کے بعد یہ وطیرہ اختیار کرلیاتھاکہ جمعۃ المبارک کےدن جامع مسجدمیں حضرت بھی تشریف لےجاتے تھے،اور بادشاہ بھی اسی مسجد میں جمعہ ادا کرتا تھا۔پھر بھی وہ اجازت لےبڑی عاجزی اور تعظیم سے آپ کی قدم بوسی کرلیتا تھا۔

آپ نے تقریباً 80سال کی عمر پائی اورآخری عمر میں ضعف کے بسبب اکثر بیمار رہنے لگے ۔ بالآخرآپ نے 24/ربیع الاول 1142ھ بمطابق 1729ء کو وصال فرمایااور اپنی مسکونہ حویلی جو قلعہ اور جامع مسجد کے درمیان واقع تھی ، میں مدفون ہوئے ۔آپ کامزارمبارک دہلی میں مرجع خلائق ہے ۔اللہ تعالیٰ ہمیں اولیائے کاملین کے نقش قدم پر چلتے ہوئے ان کے فیوض و برکات سے بہرمند فرمائے ۔ آمین